ҚР еңбек кодексі

123-бап. Еңбекке  сағаттық ақы төлеу     

 Жұмыс күні толық  болмаған немесе ол толық жүктелмеген  кезде нақты орындалған жұмыстар  үшін, сондай-ақ уақытша немесе  біржолғы сипаттағы жұмыстарға  ақы төлеу үшін еңбек шартының, ұжымдық шарттың талаптарымен  және (немесе) жұмыс берушінің актісімен  еңбекке сағаттық ақы төлеуді  белгілеуге болады.     

124-бап. Жалақыны  индекстеу     

 Жалақыны көбейту жұмыс  берушінің Қазақстан Республикасының  нормативтік құқықтық актілерінде  тиісті кезеңге белгіленген инфляция  деңгейін негізге ала отырып, келісімдерде, ұжымдық шартта немесе  жұмыс берушінің актісінде белгіленген  тәртіппен жүргізетін жалақыны  индекстеуін қамтиды.     

125-бап. Еңбекке  ақы төлеуді ұйымдастыру     

1. Қызметкерлерге қойылатын  біліктілік талаптары мен белгілі  бір жұмыс түрлерінің күрделілігі  Жұмысшылардың жұмыстары мен  кәсіптерінің бірыңғай тарифтік-біліктілік  анықтамалығы, жұмысшы кәсіптерінің  тарифтік-біліктілік сипаттамалары,  Басшылардың, мамандардың және  басқа да қызметшілер лауазымдарының  біліктілік анықтамалығы, сондай-ақ  ұйымдар басшыларының, мамандарының  және басқа да қызметшілері  лауазымдарының үлгілік біліктілік  сипаттамалары негізінде белгіленеді. P030012 
      2. Орындалатын жұмыстарды белгілі бір күрделілікке жатқызу және қызметкерлерге біліктілік разрядтары мен санаттарын беру Жұмысшылардың жұмыстары мен кәсіптерінің бірыңғай тарифтік-біліктілік анықтамалығына және Басшылардың, мамандардың және басқа да қызметшілер лауазымдарының біліктілік анықтамалығына, жұмысшы кәсіптерінің тарифтік-біліктілік сипаттамаларына және ұйымдар басшыларының, мамандардың және басқа да қызметшілер лауазымдарының үлгілік біліктілік сипаттамаларына сәйкес жүргізіледі. 
      3. Осы баптың 1-тармағында көрсетілген анықтамалықтарды, жұмысшы кәсіптерінің тарифтік-біліктілік сипаттамаларын әзірлеуді, қайта қарауды, байқап көруді, бекітуді және қолдану тәртібін еңбек жөніндегі уәкілетті мемлекеттік орган айқындайды. Әр түрлі экономикалық қызмет ұйымдары басшыларының, мамандарының және басқа да қызметшілері лауазымдарының үлгілік біліктілік сипаттамаларын тиісті қызмет саласының уәкілетті мемлекеттік органдары еңбек жөніндегі уәкілетті мемлекеттік органмен келісе отырып әзірлейді және бекітеді.      

126-бап. Еңбекке  ақы төлеу жүйелері     

1. Қызметкерлердің еңбегіне  уақыт бойынша, кесімді немесе  өзге де еңбекке ақы төлеу  жүйелері бойынша ақы төленеді. Ақы төлеу жеке және (немесе) ұжымдық  еңбек нәтижелері үшін жүргізілуі  мүмкін. 
      Еңбекке ақы төлеу жүйесі тарифтік, тарифсіз немесе аралас жүйелер негізінде қалыптастырылуы мүмкін. 
      Еңбекке ақы төлеудің тарифтік жүйесі: тарифтік ставкаларды (айлықақыларды), тарифтік торды, тарифтік коэффициенттерді қамтиды. 
      Еңбекке ақы төлеудің тарифсіз жүйесі еңбекке ақы төлеуге арналған қаражатты қызметкерлердің кәсіби қабілеттерін бағалаудың өлшемдері мен принциптеріне және олардың түпкі нәтижеге қосқан үлестеріне қарай үлестік бөлуге негізделеді. 
      Еңбекке ақы төлеудің аралас жүйесінде еңбекке ақы төлеудің тарифтік және тарифсіз жүйелерінің элементтері қамтылуы мүмкін. 
      2. Жұмыс беруші қызметкерлердің өндіріс тиімділігі мен орындалатын жұмыстың сапасын арттыруға мүдделілігін күшейту үшін сыйлықақы беру жүйесін және еңбекке ынталандырудың басқа да нысандарын енгізе алады. 
      3. Қызметкерлердің еңбегіне ақы төлеу және еңбекке ынталандыру жүйелері ұжымдық шарттың, еңбек шартының талаптарында және (немесе) жұмыс берушінің актілерінде айқындалады. 
      4. Еңбекке ақы төлеу жүйесі біржолғы ынталандырушы төлемдерді есепке алмағанда, қызметкерлердің орташа айлық жалақысының кемінде 75 проценті болатын негізгі жалақы үлесін (жалақының негізгі бөлігіне қатысты) қамтамасыз етуге тиіс. 
      5. Мемлекеттік бюджет және Қазақстан Республикасы Ұлттық Банкінің сметасы (бюджеті) есебінен ұсталатын ұйымдар қызметкерлерінің еңбегіне ақы төлеу жүйесі Қазақстан Республикасының нормативтік құқықтық актілерінде белгіленеді. 
      6. Акцияларының бақылау пакеті мемлекетке тиесілі ұлттық компаниялар мен акционерлік қоғамдар басшыларының еңбегіне ақы төлеу және оларға сыйлықақы беру шарттары Қазақстан Республикасының Үкіметі бекіткен Үлгілік ереженің негізінде айқындалады. 
      7. Қызметтер көрсетуге (тауарларына, жұмыстарына) тарифтерді (бағаларды, алым ставкаларын) мемлекеттік реттеу енгізілетін ұйымдар қызметкерлерінің еңбегіне ақы төлеу жүйесін қараудың және келісудің тәртібін еңбек жөніндегі уәкілетті мемлекеттік орган белгілейді . 
      8. Еңбек шартында, ұжымдық шартта, келісімдерде, жұмыс берушінің актілерінде айқындалған еңбекке ақы төлеу талаптары осы Кодексте және Қазақстан Республикасының өзге де нормативтік құқықтық актілерінде белгіленген талаптармен салыстырғанда нашар бола алмайды.     

127-бап. Үстеме  жұмысқа ақы төлеу     

 Еңбекке уақыт бойынша  ақы төлеу кезінде үстеме уақыттағы  жұмысқа кемінде біржарым есе  мөлшерде ақы төлеу жүргізіледі.  Еңбекке кесімді ақы төлеу  кезінде үстеме уақыттағы жұмысқа  қызметкердің белгіленген тарифтік  ставкасының (лауазымдық айлықақысының)  кемінде елу проценті мөлшерінде  қосымша ақы төленеді.     

128-бап. Мереке  және демалыс күндеріндегі жұмысқа  ақы  
                төлеу     

 Мереке және демалыс  күндеріндегі жұмысқа қызметкердің  күндік (сағаттық) ставкасы негізге  алына отырып, кемінде екі есе  мөлшерде ақы төлеу жүргізіледі.      

129-бап. Түнгі  уақыттағы еңбекке ақы төлеу     

 Түнгі уақыттағы жұмыстың  әр сағатына қызметкердің күндік (сағаттық) ставкасы негізге алына  отырып, кемінде бір жарым есе  мөлшерде ақы төленеді.     

130-бап. Әр түрлі  біліктілік жұмыстарын орындаған  кезде  
                еңбекке ақы төлеу     

 Қызметкер әр түрлі  біліктілік жұмыстарын орындаған  кезде оның еңбегіне неғұрлым  жоғары біліктілік жұмысы бойынша  ақы төленеді. 
      Жоғары біліктілік қызметкеріне өндіріс сипатын ескере отырып оған тағайындалған разрядтан төмен тарифтелетін жұмысты орындау тапсырылған жағдайда, еңбекке ақы төлеу оған тағайындалған біліктілік (разряд) бойынша жүргізіледі.     

131-бап. Лауазымдарды  қоса атқару (қызмет ету аймағының  
                кеңеюі) және уақытша болмаған қызметкердің  
                міндеттерін орындау кезінде еңбекке ақы төлеу     

1. Бір ұйымда, өзінің еңбек  шартында қарастырылған негізгі  жұмысымен қатар басқа лауазым  бойынша қосымша жұмыс орындайтын  немесе уақытша болмаған қызметкердің  міндеттерін өзінің негізгі жұмысынан  босатылмай орындайтын қызметкерлерге  қосымша ақы 
төленеді. 
      2. Жұмыс беруші лауазымдарды қоса атқарғаны (қызмет ету аймағының кеңеюі) және уақытша болмаған қызметкердің міндеттерін орындағаны үшін берілетін қосымша ақылар мөлшерлерін қызметкермен келісе отырып белгілейді.      

132-бап. Жаңа  өндірістерді (өнімдерді) игеру кезінде  
                еңбекке ақы төлеу     

 Ұжымдық шартта және (немесе) еңбек шартында жаңа өндірістерді (өнімдерді) игеру кезеңінде қызметкердің  бұрынғы жалақысының сақталуы  көзделуі мүмкін.     

133-бап. Бос тұрып  қалу уақытына ақы төлеу     

1. Жұмыс берушінің кінәсінен  жұмыстың бос тұрып қалу уақытына  ақы төлеудің тәртібі мен талаптары  еңбек шартында, ұжымдық шартта  айқындалады және қызметкердің  орташа жалақысының елу процентінен  кем емес мөлшерде белгіленеді. 
      2. Қызметкердің кінәсінен бос тұрып қалған уақытқа ақы төленбеуге тиіс.     

134-бап. Жалақы  төлеудің тәртібі мен мерзімдері      

1. Жалақы Қазақстан Республикасының  ұлттық валютасындағы ақшалай  нысанда айына кемінде бір  рет, келесі айдың бірінші онкүндігінен  кешіктірілмей төленеді. Жалақы  төленетін күн еңбек шартында, ұжымдық шартта көзделеді. 
      2. Жалақы төлеу кезінде жұмыс беруші әрбір қызметкерге тиісті кезеңдегі тиесілі жалақының құрамдас бөліктері, жүргізілген ұстап қалулардың мөлшерлері мен негіздері туралы, оның ішінде ұстап қалынған және аударылған міндетті зейнетақы жарналары туралы, сондай-ақ төленуге тиісті жалпы ақша сомасы туралы мәліметтерді жазбаша түрде ай сайын хабарлауға міндетті. 
      3. Жалақы төлеу күні демалыс немесе мереке күндеріне тура келген кезде төлем олардың қарсаңында жүргізіледі. 
      4. Жалақыны және қызметкермен еңбек шартын бұзуға байланысты өзге де төлемдерді төлеу жұмыс берушінің кінәсінен кешіктірілген кезде, жұмыс беруші қызметкерге берешек пен өсімақыны төлейді. Өсімақы мөлшері жалақы төлеу жөніндегі міндеттемелерді орындау күніне Қазақстан Республикасы Ұлттық Банкінің қайта қаржыландыру ставкасын негізге ала отырып есептеледі және төлем жүргізілуге тиісті күннен кейінгі күннен бастап әрбір кешіктірілген күнтізбелік күн үшін есептеледі және төлем жасалған күнмен аяқталады. 
      5. Еңбек шарты тоқтатылған кезде жұмыс берушіден қызметкерге тиесілі барлық сомаларды төлеу шарт аяқталған күннен кейінгі үш жұмыс күнінен кешіктірілмей жүргізіледі.     

135-бап. Жалақы  төленетін орын     

 Қызметкерлерге жалақы  төлеу, егер еңбек шартының, ұжымдық  шарттың талаптарында өзгеше  көзделмесе, олардың жұмыс істейтін  орнында жүргізілуге тиіс.     

136-бап. Қызметкердің  орташа айлық жалақысын есептеу      

1. Бес күндік, сондай-ақ  алты күндік жұмыс аптасында  орташа айлық жалақыны есептеу  белгіленген қосымша ақылар мен  үстеме ақылар, сыйлықақылар және  еңбекке ақы төлеу жүйесінде  көзделген тұрақты сипаттағы  басқа да ынталандыру төлемдері  ескеріле отырып, тиісті кезеңдегі  орташа күндік (сағаттық) жалақының  есебінен нақты жұмыс істелген  уақыт үшін жүргізіледі. 
      2. Осы Кодекске сәйкес тиісті ақы (төлем) төлеуге байланысты оқиғаның алдындағы он екі күнтізбелік ай орташа жалақыны есептеу үшін есептік кезең болып табылады. Күнтізбелік он екі айдан аз жұмыс істеген қызметкерлер үшін орташа айлық жалақы нақты жұмыс істелген уақыт бойынша айқындалады. 
      3. Орташа айлық жалақыны айқындаудың осы Кодексте көзделген барлық жағдайлары үшін Қазақстан Республикасының Үкіметі оны есептеудің бірыңғай тәртібін белгілейді . 
      4. Егер бұл қызметкердің жағдайын нашарлатпайтын болса, ұжымдық шартта орташа жалақыны есептеудің өзге кезеңдері көзделуі мүмкін.      

137-бап. Жалақыдан  ұстап қалу     

1. Қызметкердің жалақысынан  ұстап қалу сот шешімі бойынша,  сондай-ақ Қазақстан Республикасының  заңдарында көзделген жағдайларда  жүргізіледі. 
      2. Қызметкердің өзі жұмыс істейтін ұйымға берешегін өтеу үшін оның жалақысынан ұстап қалу қызметкердің жазбаша келісімі бар болған кезде жұмыс берушінің актісі негізінде жүргізілуі мүмкін. 
      3. Ай сайынғы ұстап қалудың жалпы мөлшері қызметкерге тиесілі жалақының елу процентінен аспауға тиіс.     

138-бап. Қызметкердің  қайтыс болуына байланысты  
                алынбаған жалақыны беру     

 Қызметкердің қайтыс  болуына байланысты алынбаған  жалақы Қазақстан Республикасының  азаматтық заңнамасында белгіленген тәртіппен беріледі.

11-тарау. КӘСІПТІК  ДАЯРЛАУ, ҚАЙТА ДАЯРЛАУ ЖӘНЕ  БІЛІКТІЛІКТІ АРТТЫРУ     

139-бап. Осы тарауда  пайдаланылатын ұғымдар     

 Осы тарауда мынадай  ұғымдар пайдаланылады: 
      1) оқыту шарты - жұмыс беруші мен оқитын адамның арасындағы кәсіптік даярлау, қайта даярлау және біліктілікті арттыру шарттары туралы жазбаша келісім; 
      2) кәсіптік даярлау - белгілі бір жұмыс түрін орындауға қажетті жаңа кәсіби дағдыларды меңгеру немесе кәсіби дағдыларды өзгерту үшін адамды дамытуға бағытталған кәсіптік оқыту нысаны; 
      3) қайта даярлау - басқа кәсіпті немесе мамандықты игеруге мүмкіндік беретін кәсіптік оқыту нысаны; 
      4) біліктілікті арттыру - бұрын алған кәсіптік білімін, шеберлігі мен дағдыларын қолдауға, кеңейтуге, тереңдету мен жетілдіруге мүмкіндік беретін кәсіптік оқыту нысаны.      

140-бап. Жұмыс  берушінің даярлау, қайта даярлау  және  
                біліктілікті арттыру жөніндегі құқықтары мен  
                міндеттері     

1. Ұйымның жұмыс істеуі  мен дамуы үшін кәсіптік даярлаудың, қайта даярлау мен біліктілікті  арттырудың қажеттігін және оның  көлемін жұмыс беруші айқындайды. 
      2. Жұмыс беруші қызметкерлерді немесе өзімен еңбек қатынастарында тұрмайтын өзге адамдарды (бұдан әрі - оқитын адамдар) кәсіптік даярлауды, қайта даярлауды және олардың біліктілігін арттыруды: 
      1) тікелей ұйымда; 
      2) техникалық және кәсіптік, орта білімнен кейінгі, жоғары және жоғары оқу орнынан кейінгі білімнің білім беру бағдарламаларын іске асыратын білім беру ұйымдарында жүргізеді. 
      3. Жұмыс беруші кәсіптік даярлаудан, қайта даярлаудан немесе біліктілігін арттырудан өтетін қызметкерлерге осы Кодексте, келісімдерде, ұжымдық шартта, еңбек шартында көзделген жұмысты оқумен қатар алып жүру үшін жағдайлар жасауға міндетті. 
      Ескерту. 140-бапқа өзгерту енгізілді - Қазақстан Республикасының 2007.07.27. N 320 (қолданысқа енгізілу тәртібін  2-баптан қараңыз) Заңымен.     

141-бап. Жұмыс  берушінің жолдамасы бойынша  білім беру  
                ұйымдарында кәсіптік даярлау, қайта даярлау  
                және біліктілікті арттыру      

1. Жұмыс берушінің жолдамасы  бойынша білім беру ұйымдарында  оқитын адамдарды кәсіптік даярлау,  қайта даярлау және олардың  біліктілігін арттыру оқыту шартына  сәйкес жұмыс берушінің қаражаты  немесе Қазақстан Республикасының  заңнамасында тыйым салынбаған  өзге де қаражаттар есебінен  жүзеге асырылады. 
      2. Келісімде, ұжымдық шартта және (немесе) еңбек шартында оқытуға байланысты жеңілдіктер мен өтемақы төлемдері көзделуі мүмкін.      

142-бап. Ұйымда  қызметкерлерді кәсіптік даярлау,  қайта  
                даярлау және олардың біліктілігін арттыру     

1. Ұйымда қызметкерлерді  кәсіптік даярлауды, қайта даярлауды  және олардың біліктілігін арттыруды  жұмыс беруші жүзеге асырады. 
      2. Кадрларды кәсіптік даярлау, қайта даярлау және олардың біліктілігін арттыру нысандарын жұмыс беруші айқындайды. 
      3. Ұйымда кадрларды кәсіптік даярлауға, қайта даярлауға және олардың біліктілігін арттыруға қойылатын жалпы талаптарды Қазақстан Республикасының Үкіметі айқындайды .     

143-бап. Қызметкерлердің  кәсіптік даярлау, қайта  
                даярлау және біліктілікті арттыру жөніндегі  
                құқықтары мен міндеттері      

1. Қызметкерлердің жаңа  кәсіптер мен мамандықтарға оқытуды  қоса алғанда, кәсіптік даярлауға,  қайта даярлауға және біліктілікті  арттыруға құқығы бар. 
      2. Кәсіптік даярлаудан, қайта даярлаудан немесе біліктілікті арттырудан өтетін қызметкерлер жұмыс берушімен келісе отырып жұмыстан босатылуы не жұмысты толық емес жұмыс уақыты жағдайында орындауы мүмкін. 
      3. Кәсіптік даярлаудан, қайта даярлаудан немесе біліктілікті арттырудан өтетін қызметкерлер осы Кодексте, ұжымдық шартта, еңбек шартында көзделген кепілдіктерді пайдаланады. 
      4. Кәсіптік даярлау, қайта даярлау және біліктілікті арттыру аяқталғаннан кейін оқитын адам тараптар оқыту шартында келіскен мерзімде жұмыс берушіде жұмыспен өтеуге міндетті. 
      5. Еңбек шарты қызметкердің бастамасы бойынша немесе қызметкердің кінәсі салдарынан жұмыс берушінің бастамасы бойынша мерзімінен бұрын бұзылған жағдайда қызметкер өзін оқытуға байланысты шығындарды жұмыспен өтеу мерзімінің жұмыс істелмеген мерзіміне барабар мөлшерде жұмыс берушіге өтейді.      

144-бап. Оқыту  шартының мазмұны