Творчество И.А.Калинкина

      Икельце валось 

      Иван  Алексеевич Калинкин чачсь Ульяновской  областень Чей велесэ. Эйкакшпингезэ  ды мазый иензэ жо ютасть Покш Игнатовань районсо. Сынст семиянть ветизь тозонь войнань стакачитне. Ламо майсемат печтясть, зярс эзть пачкоде Семёновканть видьс (ней те велинесь масторлангсонть нардавсь, прок арасельгак). Пачкодсть ды кадовсть эйзэнзэ ламо иес. Пингензэ перть а стувтови Иван Алексеевичнэнь се лембесь, конасонть эждизь тесэнь ломантне. Модас сюкони тенст сень кисэ эсензэ пельдеяк, аванзо пельдеяк весе эсь творчестванзо пачк. Неть: Лукерья Кузминична Зубова – се авась, кие саекшнызе эстензэ эрямо, Николай Иванович Ильин ды Семен Андреевич Бершин тонавтыцянзо, Сергей Филиппович Наумов, «8-е Марта» колхозонь прявтось, кие кучокшнызе цёранть Орданьбуев культпросветшколав тонавтнеме, мейле аравтокшнызе Ташто Чамзань велень клубонь прявтокс, ды ламо-ламо лият, кинь эйс токакшнось эрямо кизэ.

      Горьковской высшей партийной школанть прядомадо  мейле сон важодсь райгазетань  редакторокс, «Эрзянь правда» газетань отделэнь заведующейкс, «Сятко» журналонь главной редакторокс.

      Роботась  МАССР-нь Писателень союзонь правлениянь  председателекс.

      И.А. Калинкин эрзянь поэзияс совась 50-це иетнестэ ды иеде иес яла келейгавтсь  ды домкалгавтсь эсь творчествань мастерстванзо.

      Весемезэ И.А. Калинкин сёрмадсь кемгавтово стихень ды поэмань книгат, конатнень эйстэ кототне ютавтозельть рузонь кельс. Сонсь Иван Алексеевич поэзиянь паро книгакс лови «Зорянь мизолкст» (1969) стихень сборникензэ. Тезэнь совить поэтэнть сехте вадря произведениянзо. Ёвтазь сборниктенть башка эрзянь кельсэ лиссть истят книгат: «Маней пиземе» (1972), «Сырнень сюлмо» (1974), «Кизэнь менель» (1975), «Лёмзёркс чире» (1977), «Витькстамо» (1981) ды рузонь кельсэ: «Отцовский характер» (1979), «Зеленые костры» (1983), «Черёмуховый берег» лиссь Московсо, 1983), «Песни с берегов Мокши и Суры» коллективной сборникесь (1988). 1985 иестэ эрзямокшонь книжной издательствасо лиссь «Пиче вирь» поэмань сборникезэ.

      И. Калинкин, эсь прядонзо ёвтнезь, невти  весе поколениянзо. Ды эзь кельме седеезэ стакачитнеде, сон кенярды весе паронтень, бажи редямс вадрянть. А бути лиси мезеяк берянь, машты онкстамо сонзэ кода философ: «Эрси…»

      Г.И. Горбунов литературоведэсь эсь важодевкссэнзэ «И.А. Калинкин» тешкстась: «Касома ки лангсо покш нежекс И. Калинкиннэнь ульнесь минек эрзянь-мокшонь весе поэзиясь ды рузонь литературань ине художественной таштавксось».¹ Минек ине поэтэнтень сон алтась ламо стихть. Сёрмадсь А.Д. Куторкинэнь «Эрьмезь» книгадонзо. «Пришвинэнь сэдпезэ», «Островскоень усадьбасо» ды лия стихтне кармавтыть ледстямс Н.И. Ильин тонавтыцянзо, кона мерсь тензэ: сы шка ды тонсеть стихтнеяк кармить тонавтомо ломанть.

      И. Калинкинэнь творчествасо пек ламо тарка саи гражданской лирикась, ды лиясто, паряк, сон явияк поэтэнть ловныцянть эйстэ. Аволь эрьванень удалакшны сёрмадомс А.С. Пушкинэнь «Памятникенть» кондямо, секс эсь гражданской вановтонть ёвтамсто патетикась эрси а кемевиксэкс, косо-косо лисни васень таркас, ды сонзэ кисэ аволь чуросто стакалгавтови стихень формаськак. Стихесь ламо ёмавты, бути а юты седейга, сёрмадозь кодамояк датантень эли тешкстазь-ёвтазь теманть коряс. Тень кувалма ледстяви «Кемема» стихотворениясь. Поэтэсь корты минек пайстомо шкадонть, ды ялатеке тесэяк маряви сонзэ обуцясь: кемемс вандынь чинтень. Те кемемась ёрокчинть марто вейсэ лездыть цидярдомс весе даволтнэнь.

      Ды  улить И. Калинкинэнь поэзиясо истят  тешкст, конат минек вейкеяк поэтэнть арасть. Неть, васняяк, сонзэ сонеттнэ, сонетэнь каштазтнэ. Алкуксонь вечкемавтомо, седейстэ молиця лембевтеме тень а сёрмадсак. Ловнат эйсэст ды марясак, кода чави поэтэнть седеезэ. Истятнэнь ютксо, теде башка, авантень алтазь весе стихотворениятнеяк: «Янксема», «Стака кевкстема»… Стака кевкстемась – «тетят ули?» Войнань шкане те пачтясь сельведьс – тетятне маштовсть войнас. Течи кевкстемась пани эйкакшонть визьксчамас: тетяст кадынзе, ушодсь симеме. Тедеяк сёрмады поэтэсь, ды, нама, покш сеедйризкс марто.

      Пертьпельксэнтень ломанень ёнкстнэнь максомась малавгавты тенек тарьксэв сёксенть, кармавты неемс аволь ансяк рудазонзо-тарьксэнзэ. Сон панжи тенек сепозь ёжомарямотнень: тундось – кеняркс, од шка, сёксесь – сыредема ёнов шаштома, весементь эсь таркава путнема-ладсема ёвтазь домка смусть мезентькак а явомадо. Минь весе – ломанеськак, менелеськак, сёксеськак – вейсэнь пелькст. Ансяк аволь свал марятано ды редятано тень. Иетне, сыредемась максыть ломанентень ламо чарькодьксчить, конат те шкас прок сепозельть эйстэнек. Самай истямо лувсо неявить-марявить поэтэнть меельце шкань ламо стихензэ. 

                  Свалшкань толось лымбакстни састо,

                  Монень неяви, сон  кандовсь

                  Ошонть куншкас  войнань паксясто,

      Козонь чавозь тетям  кадовсь.²  

      Тесэ  ледстяма ды таго мелявкс-ризкс апак топавто учоманть кувалма – тетянь апак маря вечкеманть кисэ. Истя жо И.А. Калинкинэнь твочрествасо содавикс тарка саить очерктне, ламотне конатнень эйстэ алтазь Великой Отечественной войнань геройтненень. Истя Иван Алексеевич путсь памятник тиринь модань ванстыцятненень, сетнень туртов, конат путызь пряст течинь минек маней эрямонок кисэ. 
 
 

      

1. И.А. Калинкинэнь очерктнень тематикаст ды проблематикаст

 

      И.А. Калинкин ламо сёрмадсь войнадо. Ды лиякс  а кода. Те кажось вишка пингстэ  совась сонзэ ойментень. Сонензэ  топодекшнэсть ансяк кавксо иеть, зярдо тетязо чавовкшнось немецтнень каршо тюремстэ.

      Арась, эзь велявто Алексей Степанович раськень ломаненстэнь. Сон эрямонзо максызе эсензэ масторонзо, нинзэ, эйкакшонзо кис. Уш сестэ Иван Калинкин арсесь поладомс тетянзо апак тее тевтнень: зярдояк а стувтнемс Покш Игнатовань ёнксонь ломантнень, конат эрямонь апак жаля тюрсть немецтнень каршо. Сындест сон сёрмадсь поэмат, очеркть, конатне лиснесть башка книгасо.

      Тестэ ятонть каршо тюреме тукшность 4701 ломань, ютксост ульнесть 70 тейтерь-ават. Эйстэст 2645-тне чавовсть тюремань паксятнень лангс. 1200 ломантне казезельть орденсэ  ды медальсэ.

      Покш  Игнатовань ёнксонь кото цёратне  теевсть Советской Союзонь Героекс. Неть – А.В. Асманов, П.М. Куманев, В.Н. Бахарев, П.В. Еделев, Ф.Г. Шунеев, Г.Я. Ямушев, Ф.Р. Спиридонов весе славань ордентнэнь кавалерэсь.

      Ней тесэ а стувтнить фронтовиктнень. Покш Игнатовасо панжозь аллея, косо аштить кото геройтнень бюстост. Сынст лемест кандтнить велень ульцятне. Райцентрасо панжозь Боевой Славань музей, косо покш тарка явозь войнань шкантень. Истят музейть улить лия велень школатнесэяк. Весе те пек кенярдовты И.А. Калинкинэнь. 2003-це иестэ лиссь сонзэ «Верность Родине» книгазо, косо седейшкава ёвтни Советской Союзонь Геройтнеде, Славань орденэнь колмо степенень кавалердэнть.

      Книгась ушодови В.И. Горячевень, Покш Игнатовань ёнксонь прявтонть, «Дорогами испытаний» икельце валсонзо, косо ёвтни седейшкавань сюкпря И.А. Калинкиннэнь те книганть сёрмадоманзо кисэ.

      Иван  Алексеевичень «Всегда с нами» («Сон свал мартонок») очеркезэ алтазь А.В. Асмановнень, Советской Союзонь Героентень. Чачсь сон Чамза велесэ. Тосо ютась эйкакшпингезэ, Кавлейка лейнесэ экшелясь, кундсесь калт, чийнесь луга ланга. Покш читнестэ Асмановтнень кудосо ульнесть ламо инжеть.

      Вейке кизэнь чопода вестэ Сашань тетязо саизе семиянзо велестэ ды тусть  Московской областень Солнечногорской  райононь Юрлово велев. Ансяк мейле цёрась кармась содамо, келя, тетязо сюпаволь, кедьстэст саиксылизь ули-парост: кудост, ракшаст, сюрост.

      Од  таркасояк эзизе нолда кедензэ  стакачиденть Владимир Петрович. Сон  вачкась кудо, рамась скал, реветь, саразт. Таго уцяскав эрямось совась кудозост. Саша кармась якамо школав. Ансяк, вана, войнась сезинзе эрзянь цёранть мельтнень-арсематнень.

      И.А. Калинкин эсь очерксэнзэ келейстэ панжи  А.В. Асмановонь кеме обуцянть. Сон зениткасонзо пултась, правтсь ламо ятонь самолетт. Седеяк псить тюрематне кармасть улеме Днепранть кис. 1943-це иень сексня А.В. Асманов чавовсь.

      Очеркень  сёрмадыцясь толкови, келя, Александр  Владимировичень калмось куватьс  эзь муеве раськень ломантненень. Ансяк 1963-це иень сёксня Асмановтненень кандсть покш сёрма. Цёранть авазо сорныця кедтнесэ панжизе конвертэнть ды кармась ловномо: «Вечкевикс Анастасия Егоровна… Тонь цёрат Асманов Александр Владимирович сержантось Советэнь Масторонть кисэ бойтнесэ чавовсь кода пелемань а содыця ломань. Покш оляксчинть кисэ, конань невтизе сон ятнэнь каршо тюремстэ, СССР-нь Верховной Советэнь Президиумось 1943 иень декабрянь 24-це чинь Указсонзо макссь тензэ Советской Союзонь лем».³ Правительственной сёрманть алов кедьчелькензэ путызе Л. Брежнев.

      Седе  тов И.А. Калинкин ёвтни, кода те кулясь стявтынзе пильге лангс Москов ало Юрлово веленть ды Покш Игнатованть. Муизь таркантькак, козонь калмизь алкуксонь героенть. Те – Ходорово Украинань велесь, –  тешксты И.А. Калинкин.

      Ловнат  очеркень меельце валрисьметнень, косо невтеви кода Анастасия Егоровна лайши цёранзо калмонть лангсо, поцерсо лисить сельведтне… Алкукскак геройтне а кулсить.

      «Сквозь всполони огня» («Толонь киява») очерксэнть ёвтневи В.Н. Бахаревде. Сон чачсь Аржадеева велесэ. Важодсь колхозсо. Зярдо ушодовсь войнась, тусь фронтов. 1943 иень октябрянь 7–8 читнестэ Василий Никифирович васенцекс пачкодсь Днепранть тона чирезэнзэ ды кармась леднеме немецтнень лангс. Сонзэ мельга уйсть лиятнеяк. Ятонть контратакась лепштязель. Тень кисэ В.Н. Бахаревнень максозель Советской Союзонь Героень лемесь.

      1944-це  иестэ Василий Никифорович стакасто  ранязель ды сась кудов. Колоньгеменде  ламо иеть сон ульнесь Аржадеевской  велень Советэнь прявтокс. Остатка  иетнестэ В.Н. Бахарев эрясь  Саранскойсэ.

      Тесэ  ёвтневи И.А. Калинкинэнь очеркень героенть эрямодонзо. Зярдо жо ловнат кувалманзо сёрмадовксонть, весе сэрьсэ сти те ломанесь, сонзэ тевензэ, ялганзо, конатнень марто явсь цигарканзо, ярсамопелензэ.

      Писателесь  невти Бахаревень немецтнень каршо  кежей тюрицякс. Теке марто –  чевте седей ломанекс. Окопсо сеедьстэ морсесь эрзянь морот. Весе кунсолость сонзэ вайгелензэ. Зярдо тюремань паксясо теевиль а куш, а каш, В.Н. Бахарев ушодыль нинстэнь Мария Михайловнанень сёрмань сёрмадомо. Мейле таргинзе зепстэнзэ фотокарточканть ды куватьс вансь семиянзо лангс. Кемсь, сонзэ тевтнень поладсызь эйкакшонзо. Истя лисськак. Тень эйс кемевти писателесь И.А. Калинкин.

      Днепранть трокс уеманть кис Советской Союзонь Героекс теевсь Чукалы велень эрзясь П.В. Еделев. Сон воевась. Центральной фронтонь сисемеце гвардейской кавалерийской корпуссо. Васняяк писателесь ёвтни, кода уш эйкакшпингстэ Петя кармась лишмень вечкеме. Мейле сонзэ аравтызь конюхокс. Ансяк вана уцяскав эрямонть сезизе войнась. Писателесь П.В. Еделькинэнь невти апелицякс. Зярдо эрявсть теемс плотт, эрзянь цёрась васенцекс ёвтызе мелензэ топавтомс те тевенть. Сынь нурька шкас кеме уськсэ сюлмсизь чочктнень, лангозост путсть пулеметт ды веть кармасть уеме Днепранть вить чирезэнзэ. Немецтне бомбасть апелицятнень, леднесть лангаст, ялатеке сынь пачкодсть тона ёнов ды чавсть ламо ятт.

      Седе  тов И.А. Калинкин ёвтни, кода П.В. Еделев сась отпусков, вастовсь нинзэ Ксения Степановна марто. Сонзэ учость Чукалы велень эрицятнеяк.

      Кемень  чить Героесь оймсесь тиринь велесэнзэ. Мейле таго фронтов. Цёрась изнизе куломанть. И.А. Калинкин ёвтни, кода Петр Васильевич стакасто ранявсь. Сонзэ одс тонавтызь якамо. Ней уш – палкине лангсо. Очерксэнть минь нетяно, кода фронтовикесь важоди велень Советэнь прявтокс. Ансяк чокшне ланга рунгозо кармась чулксетеме.

      Арась ютксонок Героесь. Сондензэ ледстнематне кадовсть И.А. Калинкинэнь книгантень.

      П.М. Куманевдо очеркенть лемезэ «Герой Днепра». Сондензэ ламо сёрмадозель  «Эрзянь правда» газетасо, «Сяткосо». Писателесь И.А. Калинкин ёвтни Героенть эрямонь кинзэ парсте содазь. Эрьва валось ашти таркасонзо, аламонь аламонь панжи Советской Союзонь героенть П.М. Куманевонь тевензэ-валонзо. Иван Алексеевич, мерят, теке ютась сеть войнань качамонь китнева, уйсь Днепрань лакиця ведьга ды героензэ марто лиссь изницякс. Писателесь, теке эсь сельмсэнзэ, вансь, кода взводонь командирэсь, лейтенантось Куманев макснесь приказт. Сонсь маштсь комськавтово ятт, сайсь пулемет, омбоценть лангс ёртсь граната. Кирвазтизе.

      Келя, Паша Куманев уцяскав теште ало  чачсь. Паряк, алкукскак, истя. Бути сонзэ  эрямонть аволизе сезе войнась. Геройтне а кулсить. Сынст оймест теевить каргокс ды ливтнить сэнь менельга. Нать алкукс истя.

      А вана Советской Союзонь Геройденть Ф.Г. Шунеевде Иван Алексеевич сёрмадсь документальной повесть, кона саи книгасонть сехте покш тарка.

      И.А. Калинкинэнь очеркензэ а молить вейке-вейкень ёнов. Секскак сынь шождасто ловновить. Вана кода ушодови П.Я. Ямушевде очеркезэ: «Се иень август ковсто Григорий Яковлевич сась варштамост эйкакшпингень таркатнень. Ютась паксятнева, лугань теине яннэтнева, сеть таркатнева, кува чийнесь кепе-штапо. Зярдо кассь покшсто, тия якась вечкевикс тейтерензэ марто…»